Radhë kilometrike në Morinë, qytetarët presin me orë të tëra për t’u futur në Kosovë

Qytetarët që kanë udhëtuar nga Shqipëria në Kosovë gjatë të shtunës është dashur të presin për orë të tëra në Morinë, duke shkaktuar radhë që arritën deri në disa kilometra. Kjo pasi kusht për të hyrë në Kosovë, sipas rregullave të reja të vendosura nga qeveria e Albin Kurtit, është vaksina apo testi për çdo qytetar që kërkon të futet në territor.

Sipas raportimeve, në punë kanë qenë 5 sportele gjithsej, ndër të cilat, 4 për makinat dhe 1 për mjetet e tonazhit të rëndë.

Situata në Morinë është përsëritur gjatë kësaj jave, për shkak të masave të reja që hynë në fuqi në Kosovë. Nga e hëna, edhe hyrja në Shqipëri do të jetë e kushtëzuar, pasi Komiteti Teknik i Ekspertëve prezantoi masat e reja anti-COVID, për shkak të shtimit të shpejtë të rasteve në vend.

Sipas rregullave të reja, që nisën të aplikohen me datë 30 gusht çdo person i cili hyn në Republikën e Kosovës, duhet të ketë një nga dëshmitë e mëposhtme:

• Certifikatë vaksinimi për vaksinimin e plotë ose marrjen e një dozë të vaksinës kundër COVID-19;
• Test RT-PCR negativ për COVID-19, jo më i vjetër se 72 orë;
• Dëshmi se personi ka kaluar COVID-19 (test RT-PCR pozitiv i lëshuar jo më pak se 21 ditë dhe jo më shumë se 180 ditë ose rezultat pozitiv i testit të antitrupave serologjik –IgG, i lëshuar më së shumti para 30 ditëve;
• Test i shpejtë antigjen negativ jo më i vjetër se 48 orë.