Rrëmbeu një person vitin e kaluar, ekstradohet nga Greqia në Shqipëri 29-vjeçari

Ekstradohet nga Greqia në Shqipëri, 29-vjeçari me iniciale B. Xh, pasi ishte shpallur në kërkim ndërkombëtar.

Uniformat blu bëjnë me dije se i riu akuzohet se ka rrëmbyer dhe ka mbajtur peng një person në vitin 2019.

Sipas policisë 29-vjeçari në bashkëpunim më një person tjetër i kërkuan familjes së personit të rrëmbyer 4000 euro për lirimin e pengut.

“Nga Interpol Tirana u krye ekstradimi nga Athina/Greqi drejt vendit tonë, i shtetasit shqiptar B. Xh., 29 vjeç, lindur në Burrel. Shtetasi B. Xh. ishte shpallur në kërkim ndërkombëtar nga ZQK Interpol Tirana dhe falë shkëmbimit të informacionit që dispononte Departamenti i Policisë Kriminale dhe Interpol Tirana për vendndodhjen e këtij personi, në bashkëpunim me Interpol Athinën u bë e mundur kapja dhe arrestimi i tij me qëllim ekstradimi drejt Shqipërisë.

Gjykata e Rrethit Gjyqësor Krujë i ka vendosur shtetasit B. Xh., masën e sigurisë “Arrest në burg” për veprën penale “Rrëmbimi ose mbajtja peng e personit”.

Përmbledhje e ngjarjes së ndodhur: Shtetasi B. Xh., në bashkëpunim me një person tjetër, ka rrëmbyer në qytetin e Sarandës, në vitin 2019, shtetasin me inicialet B. Z. dhe e ka mbajtur peng në Fushë-Krujë. Rrëmbyesit i kërkuan familjes së personit të rrëmbyer 4000 euro për lirimin e pengut”, thuhet në njoftimin e Policisë.