Rrezik për falimentim, bizneset në Vlorë protestojnë për heqjen e kufizimit të lëvizjes

Kufizimi i orarit dhe mbyllja e lokaleve nga policia ka bërë që pronarët e disa bizneseve në Vlorë të protestojnë sot para Drejtorisë së Policisë së qytetit bregdetar.

Ata kërkojnë që vendimi të rishikohet dhe ashtu si vendet e rajonit, të lejohet lëvizja e qytetarëve edhe pas orës 00:00, pasi vendimi i qeverisë dëmton drejtpërdrejt bizneset, të cilat jo pak herë janë gjobitur, madje edhe në mënyrë selektive.

“Marr shkak nga kjo situatë, ku çdo natë në çdo biznes kemi vetëm debate dhe sherre. Ne jemi mbledhur dhe kemi vendosur që në rast se kryeministri nuk merr vendim që të ndryshojë orarin e mbylljes së aktivitetit të bizneseve përgjatë Lungomares, ne të gjithë si aktivitete, jo vetëm në Lungomare por në të gjithë Vlorën do të krijojmë një mbyllje totale duke filluar që nga e hëna,” – deklaroi Dionis Sota, sipërmarrës.

Largimi i klientëve, të cilët në qytete turistike si Vlora vijnë vetëm gjatë tre muajve të vitit, është falimentim, shprehen sipërmarrësit.

Për këtë arsye, ata kërkojnë që të rishikohet vendimi ose në të kundërt të dielën do të mbyllin të gjithë bizneset në shenjë proteste.

Ata ironizuan edhe kryeministrin Rama duke deklaruar se nëse ka aftësi menaxheriale me këto kufizime, janë të gatshëm t’i dorëzojnë çelësat e bizneseve të tyre.

Protesta zgjati vetëm pak minuta, ndërkohë që pjesa më e madhe e sipërmarrësve zotërojnë lokale në zonën e Lungomares, e cila duhet thënë se është tepër e frekuentuar gjatë darkës për shkak të pushuesve.

LEXONI GJITHASHTU: 

• Sezon i vështirë turistik, rivendosja e kufizimeve rikthen frikën në shumë shtete evropiane
• Vendet ku shqiptarët mund të udhëtojnë gjatë verës pa kufizime
• Ligji i ri për bizneset, garanci sovrane dhe financim për ndërmarrjet e vogla dhe të mesme