“Rrezik përmbytjesh”, Bashkia e Vlorës apel urgjent qytetarëve

Pothuajse i gjithë territori i Shqipërisë është përfshirë nga reshjet e dendura të shiut. Kjo situatë ka shkaktuar shqetësim në disa bashki të vendit, të cilat kanë ftuar qytetarët të bëjnë kujdes nga vërshimet e mundshme të ujërave.

Bashkia e Vlorës me një shënim në faqen zyrtare në “Facebook” kërkon nga qytetarët të evitojnë lëvizjet e panevojshme me makina.

“Duke parë kushtet e motit në Vlorë, por edhe në të gjithë vendin, do ju luteshim të shmangni lëvizjet me makina që nuk janë të domosdoshme’, thekson bashkia.

Bashkia Vlorë kërkon gjithashtu nga banorët të bëjnë kujdes maksimal me parkimin e mjeteve, pasi disa zona mund të përmbyten nga vërshimi i ujërave.

“Për shkak të shirave të dendur, duhet të keni kujdes edhe me vendin e parkimit të makinave dhe të jeni të vëmendshëm për vendet që rrezikojnë të përmbyten! Paralajmërimet e meteorologëve për shira të vazhdueshëm, na bëjnë të jemi të kujdesshëm”, thuhet në njoftimin e bashkisë së Vlorës”, thuhet në apelin e Bashkisë së Vlorës.