Rrëzimi tragjik i avionit në Indi, mbijeton një person mes 200 viktimave

Një burrë ka mbijetuar mrekullisht nga rrëzimi tragjik i avionit të kompanisë Air India, që shkaktoi vdekjen e të paktën 200 personave, sipas një deklarate të Komisionerit të Policisë së Ahmedabadit, GS Malik, për agjencinë indiane të lajmeve ANI.

I mbijetuari është identifikuar si Vishwash Kumar Ramesh, shtetas britanik, i cili ndodhej në vendin 11A të avionit Boeing 787-8 që kishte si destinacion aeroportin Gatwick në Londër. Sipas mediave indiane, Ramesh foli nga spitali, ku ndodhet nën trajtim, dhe përshkroi momentet e tmerrshme të aksidentit:

“Tridhjetë sekonda pas ngritjes, pati një zhurmë të fortë dhe pastaj aeroplani u rrëzua. E gjitha ndodhi kaq shpejt,” u shpreh ai.

Ramesh konfirmoi identitetin e tij përmes kartës së imbarkimit, të ndarë me gazetarët në spital. Ai është personi i vetëm i konfirmuar që ka mbijetuar nga aksidenti ajror, i cili ndodhi më pak se një minutë pas ngritjes së avionit nga pista në Ahmedabad, duke u përplasur në një ndërtesë që përdorej si strehim për mjekët.

Sipas Air India, në bord ndodheshin 169 shtetas indianë, 53 britanikë, 7 portugezë dhe 1 kanadez.

Mbreti dhe Mbretëresha e Britanisë së Madhe reaguan me një deklaratë publike duke u shprehur se ishin “thellësisht të tronditur nga ngjarjet e tmerrshme në Ahmedabad këtë mëngjes”. Ata shprehën lutjet dhe ngushëllimet për familjet e viktimave që po përballen me ankthin dhe dhimbjen.

Në përgjigje të tragjedisë, Sekretari i Jashtëm britanik, David Lammy, ka mobilizuar ekipe të menaxhimit të krizave në Indi dhe Mbretërinë e Bashkuar, për të ndihmuar në përballimin e situatës dhe ofrimin e mbështetjes për familjet e prekura.

Hetimet mbi shkakun e rrëzimit kanë nisur, ndërsa autoritetet vendase dhe ndërkombëtare po punojnë për të identifikuar viktimat dhe për të mbledhur të dhëna nga kutitë e zeza të avionit.

LEXONI GJITHASHTU:

• Çfarë e shkaktoi rrëzimin e avionit me 242 persona në bord, dyshimet e ekspertëve
• “S’ka të mbijetuar nga avioni”, policia indiane: Viktima edhe në godinën ku u rrëzua