Investimet e huaja direkte arritën 273 milionë euro në periudhën e parë të vitit.

Të dhënat e Bankës Qendrore tregojnë se krahasuar me periudhën janar-mars të një viti më parë, investimet e huaja u rritën me 39 milionë euro, 17% më shumë.

Pjesa më e madhe e investimeve nuk janë nga kompani të reja, por nga ato ekzistuese.

Kapitali i ri që hyri në ekonominë shqiptare u tkurr me 18 milionë euro, ndërsa fitimet e shoqërive të huaja që janë riinvestuar në ekonomi u rritën me 15% duke arritur në 137 milionë euro.

Në fund të vitit të shkuar investimet e huaja kapën vlerën e 1 miliard e 31 milionë eurove.

Përfundimi i veprave madhore si gazsjellësi TAP, hidrocentrali i Devollit dhe lufta në Ukrainë do të jenë një sfidë këtë vit për ekonominë vendase në tërheqjen e investitorëve nga jashtë.

Vitet e fundit interesi për të investuar në Shqipëri ka qenë energjia, nafta dhe industria automotive.

LEXONI GJITHASHTU:

• 35 deputetë të PD rikërkojnë komision hetimor për investimet strategjike
• Investimet e huaja në Shqipëri u rritën me mbi 12% në vitin 2021