Rritet antisemitizmi në Francë, qeveria dënon djegien e sinagogës

Ministri i Brendshëm francez ka dënuar rritjen e antisemitizmit pas një sulmi me zjarr ndaj një sinagoge, të shtunën në një lokalitet në jug të Francës.

Një oficer policie mbeti i plagosur në sulm dhe i dyshuari, i identifikuar nga shtypi si një 33-vjeçar algjerian u plagos gjithashtu në shkëmbimin e zjarrit.

“Sinagogës ku jetonte rabini dhe familja e tij qëllimisht iu vu zjarri, teksa agresori i priste me një sëpatënë dorë. Ky është një akt anti-semit dhe si i tillë duhet dënuar, ndryshe ngremë dyshime dhe shkaktojmë konfuzion. Mendoj se francezët dhe sidomos hebrenjtë presin nga ne të kthejmë fjalët në vepra. Të gjithë kanë të drejtën të besojnë në fenë që dëshirojnë”, tha Gerald Darmanin, ministër i Brendshëm i Francës.

Në Paris, njerëzit u mblodhën të dielën për të shprehur solidaritet ndaj racizmit, antisemitizmit dhe diskriminimit. Një protestuese ngriti zërin dhe dënoi të gjitha aktet e dhunës.

“Jam e zemëruar, të gjithë duhet të jemi. Jam hebraike dhe ne hebrenjtë nuk duhet të përkulemi më dhe t’u kërkojmë falje të tjerëve. Nuk është normale të sulmosh dikë vetëm sepse është hebre dhe nuk është normale të sulmosh dikë sepse është mysliman, apo sepse është me ngjyrë. Duhet të mësojmë të bashkëjetojmë”, u shpreh një protestuese.

Prokurorët e cilësojnë sulmin një akt terrorist. Që nga nisja e konfliktit Izrael-Hamas, siguria përreth objekteve hebraike të kultit në Francë është përforcuar.

LEXONI GJITHASHTU:

• Arrestohet në Francë shefi i Telegramit
• Arrestohet në Francë i dyshuari për zjarrvënie në sinagogë: 200 policë në operacion