Rubio: Negociatat mbi programin bërthamor të Iranit do të jenë shumë teknike dhe mund të zgjasin me muaj

Sekretari i Shtetit i SHBA-së, Marco Rubio tha të martën se negociatat mbi programin bërthamor të Iranit do të jenë shumë teknike dhe mund të zgjasin me muaj. Rubio tha se një fazë e tillë do të bazohej në rihapjen e Ngushticës së Hormuzit nga Irani.

“Faza 2 është se ata duhet të angazhohen për negociata shumë specifike mbi asgjësimin e uraniumit të pasuruar shumë që është ende i varrosur thellë në një mal diku”, i tha Rubio Komitetit të Senatit për Marrëdhëniet me Jashtë.

“Ata duhet të bien dakord për të negociuar kufizime të rrepta dhe afatgjata, ose anulimin e aktivitetit të pasurimit në vendin e tyre. Sigurisht, këto janë çështje shumë teknike, kështu që nuk mendoj se mund t’i zgjidhni brenda pesë ditësh. Kjo do të kërkonte që një ekip ekspertësh të takohej gjatë një periudhe 30, 60, 90-ditore dhe të përpunonte detajet, por ata duhet të zotohen për gatishmërinë e tyre për ta bërë këtë”, tha Rubio.

Ai shtoi se së pari Irani duhet të njoftojë se ngushtica është e hapur, pa taksa, dhe se do të heqë minat dhe nuk do të qëllojë anijet.

“SHBA-të nuk i kanë ofruar Iranit lehtësim nga sanksionet për hapjen e ngushticës,” tha Rubio, duke vënë në dukje se heqja e sanksioneve do të bazohet në kushte.