Rusia dëbon 85 diplomatë nga Franca, Spanja dhe Italia

Ministria e jashtme ruse bëri të ditur se kishte urdhëruar largimin e 34 diplomatëve nga Franca, 27 nga Spanja dhe 24 nga Italia.

Ky vendim është bërë për shkak të kundërpërgjigjeve ndaj vendimeve të ngjashme të marra nga këto shtete.

Rusia ka nënvizuar përkeqësimin e mëtejshëm të marrëdhënieve me shtetet anëtare të BE-së, që nga nisja e luftës në Ukrainë.

Tre vendet janë mes shteteve europiane, të cilat kanë dëbuar më shumë se 300 diplomatë rusë që prej fillimit të luftës, raporton Yahoo News UK.

Ndër të tjera, Rusia bëri të ditur vendime të ngjashme ndaj Finlandës, Rumanisë, Danimarkës, Suedisë, Norvegjisë dhe Japonisë.

Kryeministri italian Mario Draghi e quajti njoftimin e të mërkurës nga Moska një “akt armiqësor” dhe tha se kanalet diplomatike nuk duhet të ndërpriten.

Franca tha se shpreh keqardhje për masën ruse si një përgjigje të pajustifikuar ndaj asaj që tha se ishte vendimi i saj në prill për të dëbuar “disa dhjetëra agjentë rusë që veprojnë në territorin francez nën statusin diplomatik dhe që punojnë kundër interesave tona të sigurisë”.

LEXONI GJITHASHTU

• Peter Stano: Dëbimi i 18 anëtarëve të BE-së nga Rusia, i pajustifikuar
• Luftë diplomatike Gjermani-Rusi, Moska i përgjigjet dëbimit të dy diplomatëve nga Berlini