Rusia e sulmon një qendër të transfuzionit të gjakut në Ukrainë

Rusia e ka goditur me bombë një qendër të transfuzionit të gjakut në verilindje të Ukrainës, duke vrarë dhe plagosur njerëz, ka thënë presidenti ukrainas Volodymyr Zelensky.

Zelensky nuk ka treguar hollësisht se sa persona janë vrarë apo plagosur në sulmin e së shtunës në Kupiansk, në rajonin e Harkivit.

“Vetëm ky krim lufte tregon gjithçka për agresionin rus”, tha Zelensky.

Rusia nuk ka komentuar rreth kësaj ngjarjeje. Në të kaluarën, ajo i ka mohuar akuzat se i po i sulmon civilët – apo se ka kryer krime lufte.

Qyteti Kupianski dhe vendbanimet përreth u pushtuan nga trupat ruse në ditët e para të pushtimit të plotë të Ukrainës nga Moska, i cili nisi në shkurt 2022.

Por, kjo zonë u çlirua gjatë një kundërofensive ukrainase në shtator.

Në një postim në rrjetet sociale, Zelensky i përshkroi kryerësit e sulmit si “kafshë”.

“T’i mposhtesh terroristët është çështje nderi për secilin njeri që çmon jetën”, shtoi ai.

Ky sulm ndodhi vetëm një ditë pasi Moska tha se një cisternë nafte ruse u dëmtua nga një sulm ukrainas me dronë gjatë natës së 4 gushtit në Ngushticën e Kërçit, pranë një ure që e lidh Krimenë e aneksuar nga Moska me Rusinë.

LEXONI GJITHASHTU:

• Rusia thotë se cisterna u godit nga sulmi ukrainas pranë Krimesë
• Rusia dhe Kina praktikojnë shkatërrimin e nëndetëses armike në Detin Bering