Rusia pajtohet të zgjasë marrëveshjen për drithërat vetëm për 60 ditë

Moska nuk e kundërshton zgjatjen e marrëveshjes që lejon eksportin e sigurt të drithërave nga portet ukrainase në Detin e Zi, por do të pajtohet që kjo zgjatje të jetë në kohëzgjatje prej 60 ditësh, tha zëvendësministri rus për Punë të Jashtme, Sergei Vershinin.

Ky afat kohor është përgjysmë më i shkurtër sesa marrëveshja paraprake, shkruan REL.

Vershinin i bëri këto komente pas bisedimeve të zhvilluara me zyrtarët e Kombeve të Bashkuara në Gjenevë.

Nisma për drithërat në Detin e Zi, e arritur mes Rusisë dhe Ukrainës nën ndërmjetësimin e OKB-së dhe Turqisë korrikun e kaluar, synon të ndalë krizën ushqimore globale duke lejuar eksportin e drithërave ukrainase nga tri porte të Ukrainës.

Marrëveshja, që u zgjat për 120 ditë nëntorin e kaluar, duhet të shqyrtohet sërish më 18 mars.

Në një deklaratë pas bisedimeve me zyrtaren për tregti të OKB-së, Rebeca Grynspan, dhe shefin për ndihma, Martin Griffiths, Vershinin tha se pavarësisht “bisedimeve të sinqerta dhe gjithëpërfshirëse”, Rusia theksoi se kufizimet ndaj eksporteve të saj të agrikulturës vazhdojnë të jenë të vendosura.

LEXONI GJITHASHTU

• Ministri i Mbrojtjes: Nuk ka rrezik të menjëhershëm ushtarak për Moldavinë
• Rrëfimi rrëqethës i të mbijetuarës 80 vite pas vrasjes së hebrenjve