“Rusia po fiton kohë”- Zelensky reagon ashpër pas telefonatës Trump-Putin

Presidenti i Ukrainës, Volodymyr Zelensky, ka akuzuar Rusinë se po përdor bisedimet për armëpushim thjesht për të zgjatur luftën, ndërsa vijon ofensivën në Ukrainë. Në një reagim të publikuar në rrjetet sociale, Zelensky tha se Moska “po përpiqet të fitojë kohë” dhe paralajmëroi se, nëse Kremlini vazhdon me kushte jorealiste, “duhet të përballet me pasoja të rënda”.

Kjo deklaratë vjen një ditë pas telefonatës së presidentit amerikan, Donald Trump, me presidentin rus, Vladimir Putin.

Sipas Trump, negociatat për paqe pritet të nisin “menjëherë”, por zëdhënësi i Kremlinit, Dmitry Peskov, i zbehu pritshmëritë duke deklaruar për mediat ruse se “nuk ka afate konkrete dhe nuk mund të ketë”.

Putin ka shprehur gatishmëri për të punuar mbi një “memorandum për një marrëveshje të mundshme paqeje”, por ka refuzuar propozimin për një pauzë 30-ditore të luftimeve.

Në vijim të përpjekjeve diplomatike, Zelensky zhvilloi biseda me disa liderë perëndimorë, përfshirë presidentin e Finlandës, me qëllim forcimin e presionit ndërkombëtar ndaj Moskës. Ai nënvizoi se Ukraina dhe aleatët e saj po punojnë për ta detyruar Rusinë të ndryshojë qasjen përmes sanksioneve dhe izolimit diplomatik.

Ndërkohë, Bashkimi Evropian dhe Mbretëria e Bashkuar njoftuan sanksione të reja kundër Rusisë, përfshirë bllokimin e afro 200 anijeve cisterna që përbëjnë pjesë të ashtuquajturës “flotë në hije” të eksportit të naftës ruse.

Në kontrast me këtë, Trump ka sinjalizuar se nuk mbështet vendosjen e sanksioneve të reja, duke theksuar se masa të tilla mund të rrezikojnë përparimin e arritur së fundmi.

Situata në vijën e frontit mbetet e tensionuar, me luftime intensive dhe mungesë vullneti nga pala ruse për të pranuar kushtet e një armëpushimi. Ministri gjerman i Mbrojtjes, Boris Pistorius, deklaroi se veprimet e fundit të Rusisë “flasin më shumë se fjalët e zbrazëta që kemi dëgjuar për kaq gjatë”.

“Putini po luan për kohë. Është e qartë se nuk është serioz për paqe,” u shpreh Pistorius.

Deri më tani, përpjekjet për të vendosur një armëpushim të qëndrueshëm kanë dështuar, ndërsa kriza humanitare dhe humbjet e civilëve në Ukrainë vijojnë të përkeqësohen.

LEXONI GJITHASHTU:

• Telefonata Trump-Putin: Në fokus fundi i gjakderdhjes në Ukrainë
• Macron thirrje Trumpit nga Tirana: Duhet presion ndaj Putinit, po tregohet cinik