Rutte në Samitin e NATO-s: SHBA-të janë të përkushtuara ndaj Nenit 5

Shefi i NATO-s, Mark Rutte, tha se është “plotësisht në rregull” që Presidenti i SHBA-së, Donald Trump, ndau publikisht një mesazh lavdërues ndërsa fluturonte për në Holandë për samitin e liderëve të së mërkurës, duke këmbëngulur se gjithçka që shkroi në mesazhin e tij ishte e vërtetë.

“Ajo që i thashë në mesazhin me tekst, është fakt, është plotësisht në rregull që e publikoi”, tha Rutte ndërsa samiti po fillonte në Hagë.

Ai refuzoi një gazetar i cili e pyeti nëse episodi nuk ishte pak i sikletshëm.

“Absolutisht jo”, tha ai.

Mesazhi, të cilin Trump e postoi në Truth Social ndërsa fluturonte për në Evropë të hënën, vlerësonte udhëheqësin amerikan për presionin që i bëri anëtarëve të NATO-s që të shpenzonin më shumë për mbrojtjen.

“Do të arrini diçka që ASNJË president amerikan në dekada nuk ka mundur ta bëjë. Evropa do të paguajë, siç duhet, dhe kjo do të jetë fitorja juaj”, shkroi Rutte, përpara se t’i uronte presidentit të SHBA-së udhëtime të mbara në Holandë për samitin e NATO-s.

Në të njëjtin fluturim, Trump nuk shprehu mbështetje të plotë për dispozitën e Nenit 5 të traktatit të NATO-s për mbrojtjen kolektive. Por Rutte tha se nuk ishte i shqetësuar.

“Për mua, është absolutisht e qartë se Shtetet e Bashkuara janë plotësisht të përkushtuara ndaj NATO-s, plotësisht të përkushtuara ndaj Nenit 5, dhe po, ekziston gjithashtu një pritje, që do të përmbushet sot, që kanadezët dhe evropianët do të përshpejtojnë shpenzimet e tyre”, tha ai të mërkurën.

LEXONI GJITHASHTU:

• Parlamenti i Iranit miraton planin për të pezulluar bashkëpunimin me IAEA-n
• Ambasada Amerikane në Tiranë: 5% e PBB-së në mbrojtje do forcojë sigurinë kombëtare