S’mbanin maska, policia gjobit mbi 1800 persona gjatë fundjavës

Policia njoftoi të hënën se gjobiti 1,825 persona dhe 13 administratorë lokalesh gjatë fundjavës për mosrespektim të masave anti-covid.

Prej 15 tetorit, kur mbajtja e maskës është bërë e detyrueshme edhe në mjediset e hapura, policia ka vijuar të gjobisë kalimtarët që nuk e mbajnë atë me nga 3 mijë lekë.

Në njoftimin e policisë thuhet se gjatë kontrolleve në fundjavë janë konstatuar 13 lokale që nuk kanë zbatuar urdhrin për të ndaluar muzikën pas orës 20:00 dhe për këtë ato janë gjobitur me nga 1 milionë lekë.

Ndërkohë po gjatë fundjavës policia tha se kishte shoqëruar në komisariate 15 persona të cilët nuk kishin pranuar t’u tregonin oficerëve të policisë dokumentet e identifikimit.

Prej diagnostikimit të rasteve të para me COVID-19 në Shqipëri gjatë muajit mars, autoritetet kryer rreth 140 mijë teste prej së cilave janë pikasur mbi 24 mijë raste me mbartje të virusit.

Nga këto raste, mbi 12 mijë janë mbyllur me shërim ndërsa 559 janë mbyllur me vdekje. Ekspertët e shëndetësisë kanë sugjeruar qeverinë se rritja e masave ndaj infeksionit, siç është mbajtja e maskave, mund të ndikojë në ndaljen e përhapjes së virusit.