Samiti i klimës, arrihet akordi për fondin e ‘humbjeve dhe dëmeve’

Thuajse 200 vende të botës arritën një marrëveshje historike për krijimin e një fondi për të mbështetur vendet më të prekura nga ndryshimet e klimës.

Vendet e varfra kishin insistuar prej 30 vjetësh që vendet e pasura të ndihmonin në shlyerjen e faturës për “humbjet dhe dëmet” të shkaktuara nga ngrohja globale.

Sidoqoftë, kritikët thonë se samiti COP27 në Egjipt nuk arriti aq sa duhet për reduktimin e emetimeve që shkaktojnë ndryshimet e klimës.

Sekretari i përgjithshëm i OKB-së, Antonio Guterres deklaroi se samiti nuk adresoi nevojën për një tkurrje drastike dhe theksoi se planeti ndodhet ende në “dhomën e emergjencës”.

Edhe negociatori i Mbretërisë së Bashkuar u shpreh “thellësisht i zhgënjyer” që samiti nuk shkoi dot më tej.

Marrëveshja e arritur nga COP27 ruan angazhimin për kufizimin e ngrohjes globale në 1.5 gradë Celsius mbi nivelet para industriale.

Kombet e Bashkuara thonë se thyerja e këtij pragu do të ekspozonte miliona persona të tjerë ndaj impakteve shkatërruese të klimës.

Por ekspertët deklarojnë se politikat aktuale e vendosin botën në një shteg që çon në rritjen e temperaturave me 2.7 gradë Celsius.

LEXONI GJITHASHTU:

• Kreshnik Çollaku: Protesta e 6 dhjetorit është e gabuar, mund të prodhojë incidente
• Përplasen dy automjete në Shijak, humb jetën 40-vjeçari