Samiti i kryeparlamentarëve, Sassoli: Po punojmë që integrimi i Ballkanit Perëndimor të përshpejtohet

Në ditën e dytë të samitit të Kryetarëve të Parlamenteve të vendeve të Ballkanit Perëndimor, organizuar nga Parlamenti Europian, ku u diskutua përshpejtimi i procesit të integrimit europian për këto vende, mori pjesë edhe kreu i Kuvendit, Gramoz Ruçi.

Kryeparlamentari Ruçi theksoi se Shqipëria do të vijojë në rrugën europiane për t’u integruar në BE. Ai theksoi se qeveria shqiptare dhe institucionet i kanë kryer detyrat dhe pavarësisht vendimit të fundit nga Këshilli Europian, vendi e meriton një vendimmarrje pozitive për tryezën ndërqeveritare.

“Unë, ashtu si edhe kolegët kryeparlamentarë në këtë sallë, e kemi të qartë se vendet tona nuk kanë arritur përsosmërinë. Por arritjet e Shqipërisë në procesin e integrimit janë të dukshme dhe dëshiroj të përsëris edhe njëherë që tashmë performanca jonë e meriton vendim-marrjen pozitive për  mbajtjen e Tryezës Ndërqeveritare sa më shpejt”, tha Ruçi.

Nga ana tjetër Presidenti i Parlamentit Europian, David Sassoli ka garantuar se BE po punon për të përshpejtuar integrimin e plotë të rajonit pasi Ballkani Perëndimor është shpresë për unionin.

“Bashkimi Europian është një shpresë për Ballkanin Perëndimor, por edhe Ballkani Perëndimor është  një shpresë për Bashkimin Europian”, tha Sassoli.