Sekretari i Thesarit të SHBA-së, Scott Bessent, ka sqaruar vendimin e fundit të presidentit Donald Trump në lidhje me tarifat doganore, duke theksuar se shtetet që nuk kanë reaguar me tarifa do të shpërblehen me ulje tarifash.
Në një deklaratë për mediat, Bessent ka nënvizuar se Shtetet e Bashkuara janë të gatshme të negociojnë me çdo shtet që dëshiron të diskutojë për barrierat tregtare dhe politikat monetare.
Ai ka theksuar se për vendet që kanë kërkuar të negociojnë, do të ulen tarifat bazë në 10%, si një shpërblim për bashkëpunimin dhe qëndrimin konstruktiv.
“Ne do t’u përgjigjemi këtyre vendeve dhe do të ulim tarifat bazë në 10 për qind për ata që janë të gatshëm të dialogojnë”, ka deklaruar Bessent. “Ky është një hap për të ndihmuar tregtinë globale dhe për të shmangur përshkallëzimin e mëtejshëm të tensioneve tregtare.”
Përkundrazi, Kina do të përballet me një rritje të tarifave në 125% për shkak të këmbënguljes së saj për të përshkallëzuar situatën dhe për të shkelur marrëveshjet tregtare që kanë ngjallur tensione të mëdha.
Bessent ka theksuar se ky vendim është një përpjekje për të mbrojtur interesat amerikane dhe për të frenuar praktikat e padrejta tregtare që kanë dëmtuar ekonominë e SHBA-së.
LEXONI GJITHASHTU:
