Sekuestrohen 6.5 tonë kokainë në Portugali, 3 të arrestuar, pjesë e një rrjeti

Mbi 6.5 tonelata kokainë që do të shiteshin në tregun evropian janë sekuestruar nga policia portugeze.

Tre shtetas portugezë kanë rënë në pranga, të cilët dyshohen se janë pjesë e një organizate kriminale ndërkombëtare.

“Portugalia nuk është destinacioni final i kësaj ngarkese, por vende të tjera evropiane. Sipas të dhënave tona dhe duke marrë parasysh sasinë dhe gjithë rrethanat e këtij trafiku, mund të them se po flasim për  një rrjet kriminal ndërkombëtar, me lidhje në vende të ndryshme dhe që ka kapacitetet të lëvizë sasi të mëdha droge”, tha Artur Vaz, shef i Antidrogës, Portugali.

Operacioni i koduar me emrin “Tartarus” u zhvillua përgjatë dy muajve, kohë gjatë së cilës u kryen kontrolle dhe u sekuestruan pajisje teknologjike, makina të shumta dhe dokumente.