Serbët sulm me granata në veri të Kosovës, shkak reciprociteti për targat

Gjatë mesnatës është djegur nga serbët Qendra e Regjistrimit në Zubin Potok, pasi nuk po pranojnë reciprocitetin për targat.

Ndërkohë, serbët kanë hedhur granata dore edhe në Qendrën e Regjistrimit në Zveçan, por që nuk kanë arritur ta djegin. Po ashtu ata kanë paralajmëruar edhe djegien e Qendrës së Regjistrimit në Leposaviç.

Këto ngjarje janë cilësuar nga ministri i Punëve të Brendshme, Xhelal Sveçla, si akte kriminale dhe terroriste.

Ai ka nëvizuar se “veprimet kriminale tregojnë më së miri se çfarë do të ndodhte në pikat kufitare në Jarinjë dhe Bërnjak nëse nuk do të kishim praninë e njësive speciale për të garantuar siguri”.

Ministri Sveçla ka ftuar qytetarët në veri që të respektojnë ligjet dhe të mos manipulohen nga ata të cilët mbijetojnë politikisht, apo përfitojnë materialisht, vetëm falë tensioneve.

Marrëveshja e reciprocitetit për targat, e ndërmarrë në Bruksel i detyron shoferët serbë, që kur të futen në Kosovë, të vendosin targat RKS dhe njëjta gjë vlen edhe për shoferët kosovarë që futen në territorin serb.

Mirëpo, Serbia nuk njeh Kosovën si shtet të pavarur dhe si pasojë është kundër respektimit të kësaj marrëveshje, të zbatuar pak ditë më parë nga qeveria Kurti.

Presidenti serb, Aleksandër Vuçiç e ka quajtur një “aksion kriminal” vendimin e qeverisë së Kosovës.

Ndërsa presidentja Vjosa Osmani ka theksuar se Kosova po respekton marrëveshjen dhe iu ka bërë ndërkombëtarëve që të ndalin provokimet e palës serbe.

LEXONI GJITHASHTU:

• Shqiptarët dhe serbët kundër reciprocitetit për targat
• Kurti i gatshëm për dialog, Vuçiç: Të hiqet masa e targave, pastaj bisedojmë
• Serbia katër kërkesa Kosovës për të vijuar dialogun