Ministrja e Minierave dhe Energjisë e Serbisë, Zorana Mihajlloviç ka reaguar në lidhje me deklaratën e ministrit serb për Punët e Brendshme, Aleksandër Vulin i cili tha se për stabilitetin e Ballkanit duhet që të gjithë serbët të jetojnë në një shtet.

Mihajlloviç u shpreh se deklarata e Vulin, nuk është qëndrim zyrtar i qeverisë së Serbisë.

Sipas saj, ministri mund të shprehë mendimet e tij si qytetar, por theksoi se deklarata nuk duhet të merret si qendrim zyrtar.

“Deklarata e Vulnit nuk është politikë zyrtare e qeverisë së Serbisë. Si qytetar, ai ka të drejtë t’i shprehë të gjitha dëshirat e tij, aspiratat dhe ëndrrat, por një gjë e tillë nuk është qëndrim zyrtar i qeverisë”,  tha Mihajlloviç.

Ndaj kësaj deklarate ka reaguar Ambasada e Shteteve të Bashkuara në Serbi, e cila ka thënë se ajo nuk është në përputhje me Marrëveshjen e Dejtonit apo aspiratat evropiane të Serbisë.

Më 10 korrik, në një intervistë për mediat serbe, Vulin deklaroi se mënyra e vetme që Ballkani të ketë stabilitet, është që serbët të jetojnë në një shtet.

LEXONI GJITHASHTU

• Përgjimi i Vuçiç ishte planifikuar, sipas ministrit serb
• Vuçiç: Nuk nënshkruajmë asnjë marrëveshje për njohje me Kosovën