Serbi, ndotja e ajrit dhe COVID-19 ndikojnë në sistemin e frymëmarrjes, qytetarët në protestë

Pavarësisht pandemisë dhe motit të keq me qindra qytetarë protestuan në rrugët e Beogradit duke kërkuar të merren veprime konkrete për përmirësimin e ajrit.

Sipas të dhënave nga Aleanca Globale për Shëndetin dhe Ndotjen, Serbia ka numrin më të lartë të viktimave  në Evropë shkaktuar nga ndotja e ajrit.

 “Ne po protestojmë, duam ajër më të pastër për veten tonë, për fëmijët dhe prindërit tanë,” – u shpreh Milos Stankovic, një protestues.

Trafiku është një nga shkaktarët e ndotjes së ajrit e po ashtu ndikojnë edhe djegia e qymyrit dhe drurit. Nivelet e larta dhe të dëmshme të ndotjes së ajrit janë një fenomen i përsëritur në muajt e dimrit kur fillon sezoni i ngrohjes, siç tregoi dhe një ekspert i mjedisit.

 “Pjesa më e madhe e familjeve janë duke përdorur pajisje individuale për ngrohje qoftë duke djegur dru apo qymyr. Ky proces është një burim kryesor i emetimeve primare të grimcave. Termocentralet në Serbi dhe në të gjithë rajonin janë emetuesit më të lartë të dioksidit të squfurit në Evropë,” – tha eksperti i mjedisit, Aleksandar Macura.

Ajri i ndotur ndërthurur edhe me pandeminë përbëjnë një kërcënim edhe më të madh, pasi të dyja dëmtojnë sistemin respirator të njeriut.

“Ka shumë pika që ndikojnë në këtë çështje. Sa më i ndotur të jetë ajri aq më të mëdha janë edhe efektet e pandemisë,” – sqaroi Macura.

Duke u ndalur tek protesta, një peticion i është dërguar qeverisë. Por pyetja që shtrohet është, a do të marr përgjigje?

Sipas ekspertit të mjedisit, Macura, presioni nga qytetarët po shtohet dhe qeveria më së fundmi ka kuptuar se kjo çështje nuk mund të anashkalohet.

Qeveria serbe ende nuk ka njoftuar një plan se si do të trajtojë ndotjen e ajrit në vend. Të shumta janë edhe akuzat për manipulim të të dhënave për të ulur pragun e ndotjes së ajrit.

Kalimi në burime më të pastra ngrohje do të kërkojë investime të mëdha publike po ashtu dhe kohë. Ndërkohë, qytetarët në Serbi bëjnë thirrje që të ndërmerren aksione të menjëhershme.