‘Serbia do të forcojë ushtrinë’, Hoti: Deklaratat e Vuçiç nuk kontribuojnë në paqe dhe stabilitet

Kryeministri i Kosovës Avdullah Hoti, i ka cilësuar si jo të përshtatshme deklaratat e presidentit Aleksandar Vuçiç se Serbia do të vijojë të forcojë ushtrinë e saj, pasi “konflikti i ngrirë” me Kosovën mund të përshkallëzohet në çdo moment.

“Deklarata e dhënë dje nga pala serbe, nga fqinji ynë në veri janë joadekuate. Nuk i kontribuojnë paqes dhe stabilitetit dhe nuk janë të frymën për të cilën jemi dakordësuar, që të punojmë së bashkë në procesin e dialogut. Koha e konflikteve ka kaluar. Çështjet e hapura që i kemi dy vendet tona, duhet t’i zgjidhim përmes dialogut dhe nuk ka rrugë tjetër”, tha ai.

Në një konferencë për shtyp, Hoti gjithashtu u ndal edhe në diskutimet për presidentin e ri, ndërsa tha se palët politike do të takohen në ditët në vijim, ose për të dakordësuar emrin e presidentit, ose për të caktuar datën e zgjedhjeve.

“Janë dy rrugë; partitë politike duhet të ulen bashkë për të rënë dakord për presidentin e ri, ose të shkojnë në zgjedhje, për të caktuar datën e zgjedhje të parakohshme. Besoj se së shpejti ulim të gjitha partitë dhe duhet të flasim si njerëz të civilizuar, për të gjetur zgjidhje për qytetarët”, tha ai.

Lexoni gjithashtu: 

Vuçiç krahason Kosovën me Nagorno-Karabak dhe kërcënon me luftë