Serie-A, Juventus rikthehet te suksesi, Ronaldo e Dybala vendosin fatin e bardhezinjve në Bologna

Pas dy barazimeve në Kupën e Italisë, Juventus është rikthyer tek fitorja në kampionat.

Bardhezinjtë mundën 2-0 Bolonjën në transfertën e së hënës duke u dhënë sinjalin e qartë ndjekësve se dështimi në Kupë nuk e ka ulur ritmin.

Skuadra e Maurizio Sarrit hipotekoi gjithçka që në pjesën e parë, duke shënuar dy herë me Ronaldon e më pas Dybalan.

Fillimish, portugezi shndërroi në gol një njëmbëdhjetëmetërsh, i cili u akordua pas shqyrtimit të video-asistencës teknike.

Për 35-vjeçarin, i cili është kritikuar jo pak ditët e fundit, ky ishte goli i 22-të për këtë sezon.

Më pas ishte radha e Dybalas, për të dhuruar spektakël, me një gol mjaft të bukur nga jashtë zone.

Pas këtij suksesi, Juventus shkon në kuotën e 66 pikëve duke mbetur në krye të kampionatit.

Sukses ka arritur edhe Milani, që nuk gaboi në transfertën kundër Lecces duke fituar me rezultatin 4-1.

Një sukses mjaft i rëndësishëm për kuqezinjtë edhe për sa i takon renditjes pasi i mban në garë për një vend në kupat e evropës sezonin e ardhshëm.

Aktualisht kuqezinjtë janë në vendin 7 të renditjes në kuotën e 39 pikëve, po aq sa Napoli i vendit të gjashtë.

Napolitanët kanë një ndeshje më pak, por e kanë siguruar pjesëmarrjen në Evropë pas triumfit në kupën e Italisë përballë Juventusit.

Lexoni gjithashtu:

Serie-A, Interi rikthehet te fitorja, Gjimshiti protagonist me Atlantën