Serie-A, Juventusi fiton sërish dhe bëhet gati për përballjen me Interin

Juventusi vijoi edhe këtë fundjavë marshimin drejt kreut të kampionatit italian duke fituar 3-1 ndaj Sassuolos e duke iu afruar kështu edhe më pranë Interit të vendit të dytë.

Në Torino bardhezinjtë e drejtuar nga Andrea Pirlo hasën vështirësi nga Sassuolo edhe pse këta të fundit luajtën një pjesë loje me dhjetë lojtarë pas daljes me karton të kuq të Obiang në minutën e 47-të. Shkak i vështirësive u bënë edhe lëndimet e McKennie dhe Dybalas.

Goli i Danilos u barazua nga Defrel në më pak se tetë minuta dhe u desh rreth 20 minuta të tjera që Ramsey të rikthente buzëqeshjen në radhët e kampionëve në fuqi.

Në fund Cristiano Ronaldo vulosi shifrat në 3-1. Lajmi i mirë për Pirlon ishin vetëm tre pikët dhe reagimi në fushë, pasi në tërësi shqetëson jo pak lëndimi i Paolo Dybalas dhe Weston McKennie.

Pas rasteve me COVID-19 të Alex Sandros, Cuadrados dhe De Ligtit, lëndimet e dy lojtarëve të tjerë e kushtëzon tejmase organikën e Juventusit përpara përballjes me Interin të dielën, 17 janar.

Zikaltërit u ndalën nga Roma, e cila i barazoi 2-2 në fund të dielën duke bërë që Interi të humbasë sërish pikë kundrejt Juventusit.

Pas 17 javësh kampionat, Serie-A kryesohet nga Milani me 40 pikë, pas vjen Interi me 37 pikë, Roma me 34 dhe Juventusi me 33 – bardhezinjtë kanë një ndeshje më pak.

Lexoni gjithashtu:

Serie-A, Roma ndal Interin, zikaltërit mbeten tre pikë larg Milanit kryesues

Serie-A, Milan rikthehet te fitorja, Atalanta mposht 4-1 Beneventon

Bundesliga, Dortmundi rikthehet në lojën për titull duke fituar ndaj Leipzig

La Liga, Real Madrid ndalet në barazim nga Osasuna, përfiton Barcelona