Sërish protesta për vdekjen e 22-vjeçares në Iran, manifestimet kalojnë kufijtë

Iranianët mbushën sërish rrugët e Teheranit dhe qyteteve të tjera për të protestuar për vdekjen e 22-vjeçares Mahsa Amini. Mbi 1.200 persona janë arrestuar në shkallë vendi, ndërkohë që bilanci zyrtar i vdekjeve flet për 41 viktima.

Por sipas organizatës joqeveritare në mërgim, Iran Human Rights, bilanci real është me 76 të vdekur si pasojë e represionit të ashpër.

Gjatë manifestimit, studentët e Universitetit të Teheranit bërtisnin parulla të tipit “Gra, jetë dhe liri” dhe kërkonin lirimin e protestuesve të arrestuar.

Edhe iranianët që jetojnë në Stamboll u mblodhën përpara konsullatës iraniane atje, duke zgjeruar protestat përballë dhunës policore dhe bllokimit të internetit.

“Ne rezistojmë për të marrë frymë. Si një vend mik, ju kërkojmë të bëheni zëri ynë. Në Iran nuk ka internet dhe vetëm në Twitter ka 100 milionë hashtag-ë për Mahsa Amini”, tha një studente iraniane në Turqi.

Disa qindra protestues të tjerë u përballën me policinë franceze në Paris, teksa përpiqeshin të arrinin ambasadën iraniane.

Forcat e rendit përdorën gaz lotësjellës për të zmbrapsur demonstruesit, që dolën për të dytën herë në rrugët e kryeqytetit francez.

LEXONI GJITHASHTU

• Iran/ Vritet me 6 plumba 20-vjeçarja në protestë
• 17-vjeçari futet me makinë mes turmës, plagosen 11 persona, njëri rëndë
• Lufta në Ukrainë/A mund të përdorë Rusia armë bërthamore taktike?