SHBA: Aksident ajror me një aeroplan privat, 8 persona në bord

Një aeroplan i vogël privat me tetë persona në bord u rrëzua dhe shpërtheu në flakë teksa po ngrihej nga një aeroport në Maine, njoftoi Administrata Federale e Aviacionit të SHBA-së (FAA), pa bërë të ditur fatin apo identitetin e personave që ishin në bord.

Rrëzimi i avionit me dy motorë Bombardier Challenger 600 në Aeroportin Ndërkombëtar të Bangor ndodhi rreth orës 7:45 të mbrëmjes sipas orës lokale tha FAA, duke shtuar se po përgatitet të kryejë një hetim në bashkëpunim me Bordin Kombëtar të Sigurisë së Transportit (NTSB).

Sipas raporteve të meteorologjisë, në aeroport po binte pak borë përpara rrëzimit, por autoritetet nuk kanë thënë nëse kushtet e motit luajtën ndonjë rol.

Një paralajmërim për stuhi të rëndë ishte në fuqi për pjesën më të madhe të Maine-it, përfshirë Bangor-in, qytetin e tretë më të madh.

Avioni kishte mbërritur në Maine nga Teksasi, sipas burimit të Reuters.

Kompania e regjistruar si pronare e avionit të biznesit ka të njëjtën adresë si firma ligjore, Arnold & Itkin.

Sipas të dhënave të FAA-s, avioni u vu në shërbim në prill të vitit 2020.