SHBA dëboi atasheun federal të policisë, reagon Lula: Brazili mund të kundërpërgjigjet

Presidenti brazilian, Luiz Inacio Lula da Silva ka deklaruar të marten se qeveria e Brazilit mund të reagojë në të njëjtën mënyrë pas dëbimit të një atasheu të policisë federale braziliane nga Shtetet e Bashkuara.

Duke folur me gazetarët në Hannover të Gjermanisë, Lula tha se nuk e dinte çfarë kishte ndodhur, por se Brazili do të kundërpërgjigjej nëse do të kishte abuzim nga autoritetet amerikane në rastin që përfshinte zyrtarin brazilian.

“Nuk mund ta pranojmë këtë ndërhyrje dhe abuzim me autoritetin që disa amerikanë duan të ushtrojnë mbi Brazilin”, tha ai.

Qeveria amerikane njoftoi të hënën në një postim në X se do të dëbojë një zyrtar brazilian që dyshohet se është i përfshirë në arrestimin e ish-ligjvënësit federal brazilian Alexandre Ramagem nga policia amerikane e emigracionit javën e kaluar.

Edhe pse postimi nuk e përmendi zyrtarin, ambasada amerikane në Brasilia i konfirmoi Reuters se autoriteti për të cilin bëhej fjalë ishte Marcelo Ivo de Carvalho, atasheu i policisë federale braziliane në Miami dhe oficeri ndërlidhës i qeverisë braziliane me agjencinë amerikane të imigracionit ICE.

Ramagem u lirua pas një paraburgimi të shkurtër. Ai iku nga Brazili në shtator pas dënimit të tij për komplotimin e një grushti shteti me ish-presidentin e Brazilit, Jair Bolsonaro.