SHBA financon projektin për të rritur sigurinë në doganën Shqipëri-RMV

Siguria e kufijve mes Shqipërisë dhe Maqedonisë së Veriut do të rritet në një nivel më të lartë, falë projektit të financuar nga Agjencia e Shteteve të Bashkuara për Zhvillim Ndërkombëtar (USAID).

Qeveria Amerikane po ndihmon administratat doganore të dy vendeve për të zhvilluar një pikë të përbashkët të kalimit kufitar, atë të Qafë Thanës, me synimin për të ulur ndjeshëm kohën e lëvizjes së mallrave përtej kufijve, si një hap thelbësor për të përgatitur këto vende sa i përket integrimit ekonomik drejt Bashkimit Evropian.

Ambasadorja amerikane në vendin tonë, Yuri Kim tha se ky projekt do të rrisë standardet e dy shteteve, duke dëshmuar mbështetjen e SHBA-së për integrimin e tyre në Bashkimin Evropian.

“Sot Shqipëria dhe Maqedonia e Veriut janë në prag të anëtarësimit në BE, dhe SHBA e mbështet këtë qëllim. Pajisjet e blera nga USAID do të sigurojnë që autoritetet doganore të arrijnë standarde më të larta në procedurat kufitare, lehtësimin e mjedisit për biznesin dhe kontrolleve për sigurinë,” u shpreh ambasadorja Kim.

Ky projekt përfshin pajisje skanuese mobile, matës të dendësisë, kamera dhe të tjera pajisje teknologjike. Këto pajisje do të përdoren nga dy administratat e dy doganave.

Ndërsa ambasadorja amerikane në Maqedoninë e Veriut, Kate Marie Byrnes tha se marrëveshja e kornizës bilaterale për krijimin e pikave të përbashkëta doganore, të firmosura nga kryeministrat Rama e Zaev do të ndihmojë në ndërtimin e ekonomive me të forta midis dy vendeve.

Projekti i USAID për zhvillimin ekonomik, qeverisjen dhe rritjen e ndërmarrjeve është një iniciativë rajonale që po zbatohet në 12 vendet e Evropës dhe Euroazisë, i cili synon të krijojë një rritje ekonomike gjithëpërfshirëse, të qëndrueshme dhe të mbështesë integrimin rajonal dhe euroatlantik.

LEXONI GJITHASHTU:

• Ambasadorja Yuri Kim përshëndet arrestimet e zyrtarëve në Ministrinë e Brendshme
• Ambasadorja Yuri Kim inkurajon SPAK-un për rezultate të reja
• Vendimi i Ministrisë së Brendshme të RMV bllokon në Qafë-Thanë punëtorët sezonalë nga Shqipëria