SHBA i dorëzon Kosovës dhe Serbisë studimin për liqenin e Ujmanit

SHBA, përmes ambasadave të saj në Prishtinë dhe Beograd, u ka dorëzuar qeverive të Kosovës dhe Serbisë studimin e fizibilitetit për menaxhimin e liqenit të Ujmanit.

“Sot ambasada e SHBA-së në Prishtinë dhe ajo në Beograd ua kanë dorëzuar qeverive respektive planin e Departamentit Amerikan për Energji dhe Pacific Northwest National Laboratory për menaxhimin e ujit në Liqenin e Ujmanit, duke përmbushur një nga zotimet e Marrëveshjes së Uashingtonin e nënshkruar më 4 shtator”, – thuhet në një postim në Facebook nga ana e Ambasadës së SHBA-së në Prishtinë.

Në raport propozohet krijimi i një komisioni që do të menaxhojë burimet e liqenit dhe SHBA-ja sugjeron që të ndiqet shembulli i marrëveshjes SHBA-Kanada për lumin Columbia.

Studimi është kryer nga Departamenti Amerikan i Energjisë por theksohet se jo domosdoshmërisht është opinioni i qeverisë amerikane apo ndonjë agjencie të saj.

“Ne propozojmë që Serbia dhe Kosova të marrin në konsideratë bashkëpunimin SHBA-Kanada me anë të Traktit të Lumit Kolumbia për furnizimin me ujë, kontrollin e përmbytjeve dhe agjencitë e energjetikës”, – thuhet në raport.

Ky studim vjen si pjesë e marrëveshjes së nënshkruar në Shtëpinë e Bardhë mes Serbisë dhe Kosovës në shtator të vitit 2020. Kryeministri, Albin Kurti mbi këtë marrëveshje ka mbajtur qëndrim kundër duke thënë se nuk do të ratifikohet në Parlament.

Liqeni i Ujmanit është një liqen artificial në kufirin mes Kosovës dhe Serbisë, i ndërtuar mes viteve 1979-1985, kur i gjithë territori ishte pjesë e ish-Jugosllavisë. Aktualisht liqeni menaxhohet nga të dy vendet pa ndonjë marrëveshjeje bashkëpunimi.

LEXONI GJITHASHTU: 

• ”Nga Ujmani te minischengen”, Kosova miraton planin me 16 pika
• Hoti në një mendje me Grenell: T’i vëmë emrin e presidentit Trump liqenit të Ujmanit
• Richard Grenell jep lajmin, Liqeni i Ujmanit tashmë do të quhet “Liqeni Trump”