SHBA: Izraeli mund të ketë shkelur ligjin ndërkombëtar me armët amerikane në Gaza

SHBA thotë se Izraeli mund të ketë përdorur armë të furnizuara nga Amerika në shkelje të ligjit ndërkombëtar humanitar në disa raste gjatë luftës në Gaza.

Sipas mediave të huaja, Departamenti i Shtetit thotë se është “e arsyeshme të vlerësohet” se armët e furnizuara nga SHBA janë përdorur në mënyra “të papajtueshme” me detyrimet e Izraelit.

Por DASH shtoi se qeveria amerikane nuk kishte “informacion të plotë” në vlerësimin e saj.

Raporti iu dorëzua Kongresit të premten pas një vonese.

Rishikimi i urdhëruar nga Shtëpia e Bardhë shqyrtoi se si vendi, së bashku me gjashtë të tjerë të përfshirë në konflikt, ka përdorur armë të furnizuara nga SHBA që nga fillimi i vitit të kaluar.

Ndërsa raporti ishte një qortim i qartë i disa operacioneve izraelite në Gaza, ai ndaloi së thëni përfundimisht se fushata e Forcave të Mbrojtjes të Izraelit (IDF) kishte shkelur ligjin ndërkombëtar.

Izraelit iu desh të përballej me një “sfidë të jashtëzakonshme ushtarake” duke luftuar Hamasin në Gaza, thuhej në raport.

Po ashtu aty thuhej se garancitë që kishte marrë nga Izraeli për respektimin e përdorimit ligjor të armëve amerikane ishin “të besueshme”, dhe kështu dërgesat e armëve mund të vazhdonin.

Dokumenti gjithashtu vuri në dukje se për shkak se Hamasi “përdor infrastrukturën civile për qëllime ushtarake dhe civilët si mburoja njerëzore”, shpesh ishte “e vështirë të përcaktoheshin faktet në terren në një zonë lufte aktive”, se cilat janë objektiva legjitime.

LEXONI GJITHASHTU:

• Do përdoret për dërgimin e ndihmave, ushtria amerikane ndërton portin në Gaza
• SHBA, optimiste për arritjen e një armëpushimi në Gaza