SHBA kryen sulme në Jemen, 68 të vdekur dhe 47 të plagosur

Një sulm ajror amerikan ka shkaktuar të paktën 68 viktima në një qendër ndalimi për emigrantët afrikanë në provincën Saada, në veriperëndim të Jemenit, të kontrolluar nga grupi Houthi.

Sipas kanali televiziv Al Masirah, më shumë se 47 persona u plagosën, shumica e të cilëve ndodhen në gjendje kritike. Pamjet e publikuara nga kanali tregojnë trupa të mbuluar nga rrënojat e një ndërtese të shkatërruar, duke dhënë një pasqyrë grafike të pasojave të këtij sulmi tragjik.

Ushtria amerikane nuk ka dhënë ende një koment të menjëhershëm në lidhje me këtë incident. Megjithatë, sulmi erdhi disa orë pas njoftimit të Komandës Qendrore të SHBA-së, e cila raportoi se forcat amerikane kishin goditur më shumë se 800 objektiva që nga intensifikimi i fushatës ajrore kundër Houthis më 15 mars, sipas urdhrit të Presidentit Donald Trump.

Komanda Qendrore e SHBA-së tha se këto sulme ajrore kishin “vrarë qindra luftëtarë Houthi dhe udhëheqës të shumtë të grupit”, përfshirë zyrtarë të lartë që mbikëqyrnin programet e raketave dhe dronëve të Houthis.

Autoritetet e drejtuara nga Houthi kanë deklaruar se sulmet kanë shkaktuar dhjetëra viktima civile, ndërsa numri i viktimave në mesin e anëtarëve të grupit është raportuar të ketë qenë më i vogël.

LEXONI GJITHASHTU:

• Vrasja në Vlorë, ky është 58-vjeçari që u ekzekutua në hyrje të banesës së tij
• SIPRI: Rritje e paprecedent e shpenzimeve ushtarake në botë