SHBA përkujton 11 shtatorin, Bush: Bota heshti nga zërat që u shuan

Amerikanët përkujtuan të shtunën sulmet terroriste të 11 shtatorit 2001, që u morën jetën rreth 3 mijë personave. Në një ceremoni të ndjerë, ish-presidenti George W. Bush përshkroi ndjesitë e asaj dite fatkeqe për SHBA.

Bush, asokohe president i SHBA, mbajti një fjalim në Pensilvani, aty ku njëri prej avionëve u përplas në tokë nga pasagjerët që iu kundërvunë terroristëve.

“Për ata që janë shumë të rinj dhe nuk e kujtojnë qartësisht këtë ditë, është e vështirë të përshkruash çfarë ne ndjemë. Ndjemë tmerr për shkallën e shkatërrimeve dhe nderim për kurajën dhe mirësinë për ta përballur. Ndjemë tronditje nga guximi i së keqes dhe mirënjohje për heroizmin që e kundërshtoi,” – tha Bush.

Trëndafila u vendosën pranë emrave të 2,977 viktimave, që tashmë janë përjetësuar në memorialin dedikuar 11 shtatorit në New York.

Të pranishëm në ceremoninë përkujtimore ishin presidenti Joe Biden dhe paraardhësit e tij Bill Clinton e Barack Obama. Vetë Biden nuk mbajti fjalim në këtë event, por më herët, në një video të shpërndarë nga SHBA ai përcolli mesazhin se, uniteti është forca më e madhe e popullit amerikan.

Mes lotësh, familjarë të personave që humbën jetën më 11 shtator lexuan emrat e viktimave, teksa u shënuan kështu 20 vite nga sulmet më të përgjakshme të ndodhura në tokën amerikane.

Një minutë heshtje u mbajt pikërisht në kohën kur dy avionët e marrë peng u përplasën me Kullat Binjake të “Qendrës Botërore të Tregtisë”.

LEXONI GJITHASHTU:

• Nga rrjetet sociale tek testi i ADN, si ka ndryshuar teknologjia pas sulmeve të 11 shtatorit
• 20 vite pas 11 shtatorit, lufta ndaj terrorit dështoi. Sot, botës i duhet një version i ri