SHBA po shqyrton blerjen e Ishujve Chagos, Mauritiusi: Nuk kemi marrë asnjë propozim nga Amerika

Mauritiusi tha të hënën se nuk kishte marrë asnjë propozim nga administrata Trump për Ishujt Chagos, pasi u raportua se Shtëpia e Bardhë po shqyrtonte një plan për të blerë ishujt nga Mauritiusi.

“Qeveria e Mauritiusit ka marrë shënim informacionin e raportuar nga Telegraph. Deri më sot, ajo nuk ka marrë asnjë propozim zyrtar dhe nuk është kontaktuar, as drejtpërdrejt as tërthorazi, nga administrata amerikane në lidhje me një marrëveshje të veçantë në lidhje me Diego Garcian ose Arkipelagun Chagos”, tha ajo në një deklaratë.

“Qëndrimi i Mauritiusit mbetet i pandryshuar, sovraniteti i tij mbi Chagos Arkipelag, është i panegociueshëm” theksohet më tej.

Gazeta “The Telegraph” raportoi të dielën se plani ishte midis disa opsioneve që po hartoheshin nga Shtëpia e Bardhë, në një dokument që synonte të ofronte alternativa ndaj dorëzimit të sovranitetit të arkipelagut të Oqeanit Indian nga ana e kryeministrit britanik Keir Starmer ndaj Mauritiusit.

Qeveria e Britanisë në prill pezulloi marrëveshjen e saj për të hequr dorë nga sovraniteti i Ishujve Chagos, ku ndodhet baza ajrore amerikano-britanike Diego Garcia, e cila ishte kritikuar nga Presidenti i SHBA-së Donald Trump.

Britania zhvendosi me forcë deri në 2,000 banorë indigjenë të Chagos në fund të viteve 1960 dhe 1970 për të krijuar bazën në atolin Diego Garcia, por vitin e kaluar kishte rënë dakord t’i jepte sovranitetin ish-kolonisë së Mauritiusit, ndërsa paguante 101 milionë paund (135 milionë dollarë) në vit për të siguruar instalimin.