SHBA, rregulla për mbrojtjen e të dhënave nga sulmet e Kinës, Rusisë dhe Iranit

Departamenti amerikan i Drejtësisë propozoi të hënën rregulla të reja për të mbrojtur të dhënat e qeverisë federale apo të dhënat personale të amerikanëve nga vende si Kina, Irani dhe Rusia, duke vendosur kufizime të reja në disa transaksione biznesi.

Propozimi zbaton një urdhër ekzekutiv të lëshuar në fillim të këtij viti nga Presidenti Joe Biden, i cili synon të pengojë kundërshtarët e huaj nga përdorimi i të dhënave financiare amerikane dhe të dhënave shëndetësore për sulme kibernetike, spiunazh dhe shantazh.

Përveç Kinës, Rusisë dhe Iranit, rregulli do të zbatohej edhe për Venezuelën, Kubën dhe Korenë e Veriut.

Uashingtoni është përpjekur të frenojë rrjedhën e të dhënave personale amerikane në Kinë, pjesë e një lufte të gjatë për tregtinë dhe teknologjinë.

Në vitin 2018, një komision amerikan që shqyrton investimet e huaja për kërcënime të mundshme të sigurisë kombëtare hodhi poshtë planin e firmës ‘Ant Financial’ të Kinës për të blerë kompaninë amerikane të transferimit të parave MoneyGram International. Kjo ndodhi për shkak të shqetësimeve mbi sigurinë e të dhënave që mund të përdoren për të identifikuar qytetarët amerikanë.

Propozimi i bërë të hënën dha detaje për herë të parë në lidhje me llojet dhe sasitë e të dhënave që nuk mund të transferohen, përfshirë të dhënat shëndetësore ose financiare për mbi 10,000 amerikanë.

Rregulli do t’i lejonte Departamentit të Drejtësisë të zbatonte rregulloren si përmes dënimeve penale ashtu edhe atyre civile.

Zyrtarët amerikanë u thanë gazetarëve të hënën se aplikacionet kineze si ‘TikTok-u’ mund të bien ndesh me propozimin nëse transferojnë të dhëna të ndjeshme nga përdoruesit amerikanë te një kompani kineze të cilës ato mund t’i takojnë.

LEXONI GJITHASHTU:

• Arrestimi i Ilir Metës, gazetari: Ja çfarë gjeti SPAK në celularin e Kryemadhit
• Thirrje raciste kundër Kosovës, UEFA gjobit Federatën e Futbollit të Rumanisë