Një parking katërkatësh në Nju Jork, është shembur duke shkaktuar 1 viktimë dhe 5 të plagosur.

Rrjeti televiziv, CBS raporton se i pari është shembur kati i dytë i parkingut që ndodhet në zonën financiare të Manhatanit.

Fotografitë e publikuara në rrjete sociale dëshmojnë dëmet materiale të shkaktuara ndaj makinave nga shembja.

Departamenti i Zjarrfikësve në qytetin e Nju Jorkut ka thënë se operacioni i shpëtimit ka qenë “jashtëzakonisht i rrezikshëm” për zjarrfikësit, pasi struktura ka qenë shumë “jostabile”.

“Ne kemi pasur zjarrfikësit brenda ndërtesës, duke kërkuar. Ndërtesa ka qenë duke u shembur. Mirëpo tani besojmë se të gjithë punëtorët i kemi jashtë ndërtesës”, njoftoi shërbimi i zjarrfikëses.

Kryebashkiaku i qytetit, Eric Adams, ka thënë se teknologjia e re, ka luajtur rol vital në përgjigjen emergjente, ku qeni robotik ka qenë i pari i cili ka mundur të futet në ndërtesë.