Shembja e Teatrit, deputeti Ralf Gjoni: U bë me marrëveshje mes Ramës dhe Bashës

Shembja e Teatrit Kombëtar ka shkaktuar debate të forta mes aktorëve polikë e shoqërorë në Shqipëri. Deputeti i opozitës parlamentare Ralf Gjoni tha në “Ilva Now” se, shembja e Teatrit Kombëtar ishte një marrëveshje mes kryeministrit Rama dhe kreut të opozitës, Lulzim Basha.  

Ai theksoi se kauza e artistëve shqiptarë në mbrojtje të godinës u politizua ndjeshëm muajt e fundit.

“Kam ndjerë trishtim shumë të madh për mënyrë tinëzare me të cilën u prish godina e Teatrit Kombëtar. Ora e mesit të natës më kujton orën e marrëveshjes mes Ramës dhe Bashës. Kjo ishte një marrëveshje, mes Ramës dhe Lulzim Bashës, nuk e di nëse mund ta përfshij edhe Monika Kryemadhin. Unë ndjehem pak i trishtuar kur shoh se sa e shëmtuar është gjithçka që rrethon këtë ngjarje, si nga ana e qeverisë, por edhe aktorët politikë që u përfshinë gjoja në mbrojtjen e teatrit”, tha ai.

Deputeti shtoi më tej se thirrja e regjisorit, Edmond  Budina për shpërndarjen e Parlamentit është antikushtetuese dhe në thelb nuk ka asnjë sens.

“Thirrja e Budinës për shpërndarjen e Kuvendit më duket antikushtetuese dhe pak e pa sens”, tha Ralf Gjoni.