Shënohet numri më i lartë i rasteve me COVID-19 që nga fillimi i pandemisë, shtohen shtrimet në spital

Gjatë 24 orëve të fundit në vendin tonë janë kryer 270 testime nga të cilat kanë rezultuar pozitive me COVID-19, 48 raste, kryesisht kontakte të rasteve të mëparshme, por edhe raste të reja që po hetohen.

Në komunikimin e përditshëm me publikun, dr. Flutura Beqo nga Ministria e Shëndetësisë dhe Mbrojtjes Sociale bëri me dije se shpërndarja e rasteve të reja është si vijon: 24 raste në Tiranë, 8 në Krujë, 4 në Durrës, 3 në Fier, 2 Lezhë, 2 Pukë, 3 Kamëz, 1 Gjirokastër, 1 Elbasan.

“Gjatë 24 orëve të fundit janë shëruar 5 qytetarë dhe aktualisht më shumë se 70% e të prekurve që nga fillimi i epidemisë janë shëruar.

Por vijon të ketë shtrime të reja në spitalin infektiv. Aktualisht në spitalin infektiv po marrin shërbim 52 pacientë, prej tyre 7 janë në terapi intensive dhe një i intubuar.

Në vendin tonë janë aktualisht 389 persona aktivë me COVID19, kryesisht në Tiranë, Shkodër, Krujë.

Ditët e fundit është vënë re rritje e numrit të rasteve në disa aktivitete biznesi, në institucione të ndryshme, në pjesëmarrje në ceremoni mortore dhe grumbullime.

Ndaj Ministria e Shëndetësisë dhe Mbrojtjes Sociale apelon qytetarët, bizneset, që në mënyrë strikte të respektojnë zbatimin e masave të rekomanduara: distancën fizike, përdorimin e maskave në shërbim dhe kur nuk është e mundur të respektohet distanca, higjienën personale, dezinfektimin e ambienteve, ajrosjen e tyre, në menyrë që të kufizohet përhapja e Covid19.

Inspektorët e Task-Forcës anti-COVID do të vijojnë kontrollet në çdo subjekt, në institucione apo biznese tregtare të çdo lloji, për zbatimin e protokolleve të sigurisë.

Do të vijojë bashkëpunimi me forcat e rendit për kontrollin e vazhdueshëm  për zbatimin e karantinës të qytetarëve të konfirmuar pozitive që janë pa shenja dhe që duhet të respektojnë detyrimin për të qëndruar të izoluar.

Shkelja e rregullave nga kushdo do të konsiderohet rrezik për jetën dhe shëndetin e të tjerëve”, tha ajo.

COVID-19 – Statistika (13 Qershor 2020)

Testime totale                         20132

Raste pozitive                          1464

Raste të shëruara                      1039

Raste Aktive                             389

Humbje jete                              36 (Qarku Tiranë 21, Durrës 7, Fier 4, Vlorë 1, Shkodër 2, Kukës 1)

Shpërndarja gjeografike e rasteve aktive është si vijon:

Tiranë                  220

Shkodër                45

Krujë                            40

Kamëz                  26

Durrës                  19

Pukë                         9

Lushnje               6

Vlorë                                     6

Elbasan                          4

Lezhë                   3

Fier                                                      3

Tropojë              2

Korçë                 1

Librazhd            1

Mallakastër        1

Berat                                                     1

Ura Vajgurore    1

Gjirokastër                 1