Shënohet rasti i parë me virusin kinez HMPV në Greqi

Rasti i parë i virusit kinez HMPV (virusi metapneumoni) është zbuluar në Greqi, sipas informacioneve të transmetuara nga OPEN.

I prekuri është një burrë 71-vjeçar, vajza e të cilit kishte udhëtuar së fundmi në Kinë. Pak ditë pas kthimit të saj, babai i saj shfaqi simptomat e para.

Të shtunën e kaluar, pacienti iu nënshtrua një testi PCR, i cili konfirmoi infeksionin me virusin.

71-vjeçari u shtrua fillimisht në një pavion me dy pacientë të tjerë, por u transferua në izolim.

Gjendja e tij shëndetësore është përkeqësuar të martën, për pasojë është transferuar në Klinikën e Dytë të Mushkërive.

Në të njëjtën kohë, autoritetet shëndetësore janë në proces të gjurmimit të kontakteve.

Çfarë është HMPV?

Profesori i Higjienës dhe Epidemiologjisë në EKPA, Gikas Majorkinis, iu referua natyrës së HMPV, duke theksuar se metapneumonia nuk është një sfidë e re për shëndetin publik.

“Metapneumovirusi është i njohur të paktën që nga viti 2001. Studimet kanë treguar se virusi ka qenë i pranishëm tek njerëzit për dekada të tëra dhe në moshën pesëvjeçare pothuajse të gjithë fëmijët janë ekspozuar ndaj tij”, shpjegoi ai.

HMPV i përket grupit të viruseve që shkaktojnë simptoma të ngjashme me ftohjen e zakonshme, si rrjedhje hundësh, dhimbje të fytit dhe hundë të mbytur. Megjithatë, në rastet më të rënda mund të shkaktojë pneumoni dhe të prekë të moshuarit pasi nuk siguron imunitet gjatë gjithë jetës.

“Nuk ka asnjë vaksinë apo trajtim për virusin pasi konsiderohet si një nga viruset më të lehta të frymëmarrjes. Pavarësisht kësaj, është arsyeja e dytë më e zakonshme për shtrimin në spital të fëmijëve. Por ne jemi të qetësuar, pasi HMPV është më pak i rrezikshëm se gripi apo viruset e tjera të frymëmarrjes”, vuri në dukje z. Majorka.

LEXONI GJITHASHTU:

• Rriten rastet në SHBA, perëndimi kërkon përgjigje për shpërthimin e virusit në Kinë
• Çfarë është virusi HMPV që po përhapet në Kinë