Shfaqja “Impromptu”, aktorët e rinj sjellin teatrin absurd në qytetin e Gjirokastrës

“Impromtu” është shfaqja e një grupi aktorësh të rinj, e cila po shfaqet gjatë fundjavës në skenën e teatrit “Zihni Sako” në Gjirokastër.

Autori i kësaj pjese është dramaturgu i mirënjohur Tad Mosel, ndërsa regjia e shfaqes mban firmën krijuese të Artemis Belulit.

Katër aktorë dhe administratori gjenden në skenë për të improvizuar një shfaqje, ku ashtu si jeta, perceptohet si një argëtim i pastër dhe papritur transformohet në një dramë e konceptuar në formën e teatrit absurd.

“Një histori e tillë siç e paraqitëm ne në shfaqjen e sotme mund të ndodhë rëndom në çdo profesioni por ne zgjodhëm profesionin tonë sepse e kemi më të prekshme dhe të japim një mesazh sensibilizues sesi ne artistët dhe aktorët por çdo lloj moshe të aspirojmë që të krijojmë një lloj kompakticiteti midis njeri-tjetrit dhe ta ndihmojmë njeri-tjetrin në këtë rrugë dhe jo të behemi pengesë dhe kornizim për njeri-tjetrin”, tha aktori Ronaldo Kolgjoka.

“Ishte një eksperiencë e vlefshme, nuk gjej fjalë për ta përshkruar, për ne si studentë është një mundësi që  nuk të vjen dhe sidomos për ne që jemi të Tiranës, që kemi një treg shumë të vështirë dhe kemi mundësinë që ne të eksperimentojmë, të sfidojmë veten, të vijmë me plot sakrifica dhe plot pasion në Gjirokastër ku patëm një pritje fantastike”, tha aktori Klodian Çelmeta.

“Shfaqja flet për 4 aktorë dhe vështirësitë që të rinjtë hasin jo vetëm në profesionin tonë duke informuar për rrugëtimin e një aktori dhe një të riu por gjithashtu kjo paralelizohet në çdo fushë, qëllimi im ka qenë që unë të flas diçka për të rinjtë”, tha regjisorja Artemis Beluli.

Përgjatë këti viti skena e teatrit profesionist në Gjirokastër ka mirëpritur shfaqje të interpretuara nga aktorët vendas dhe të huaj, të cilat janë duartrokitur nga artdashësit.

LEXONI GJITHASHTU:

• Muzeu Historik “Oso Kuka”, të huajt shfaqin interes për historinë e Shkodrës
• Vidhen monedhat e shfaqjes për fëmijë Bluey, kapnin vlerën 400 mijë dollarë