Shfrytëzonin fëmijët e tyre për të lypur, në pranga 4 baballarët, nënat në arrest shtëpie

Prokuroria e Tiranës, këtë të martë, ka ekzekutuar masat e sigurisë për 8 shtetas, të cilët shfrytëzonin individualisht dhe në grupe fëmijët e tyre, 9–11 vjeç, për të punuar dhe për të lypur. Bëhet e ditur se dy familje i sillnin fëmijët nga Elbasani në Tiranë, kryesisht në orët e mbrëmjes, të cilët lypnin në zonën e Bllokut, Vasil Shantos dhe në zonën e 21-it.

Sipas njoftimit, është ekzekutuar masat e sigurisë “Arrest në burg”, për shtetasit Eles Brahimaj, Rakip Sinani, Mikel Rama dhe Miklovan Gogaj dhe “Arrest në shtëpi”, për shtetaset L. B., 35 vjeçe, A. M., 41 vjeçe, M. S., 35 vjeçe dhe A. Sh., 35 vjeçe.

“Si rezultat i veprimeve hetimore dhe operacionale të kryera nga shërbimet e Komisariatit të Policisë Nr. 2, në drejtimin e Prokurorisë së Tiranës, me qëllim identifikimin dhe nxjerrjen përpara përgjegjësisë penale, të shtetasve të cilët shfrytëzojnë fëmijët, për të punuar dhe/ose për të lypur, u finalizua operacioni i koduar “Filizat”, gjatë të cilit u ekzekutuan masat e sigurisë:

-“Arrest në burg”, për shtetasit E. B., 41 vjeç, R. S., 35 vjeç, M. R., 35 vjeç dhe M. G., 34 vjeç;

-“Arrest në shtëpi”, për shtetaset L. B., 35 vjeçe, A. M., 41 vjeçe, M. S., 35 vjeçe dhe A. Sh., 35 vjeçe.

Nga veprimet hetimore disamujore, ka rezultuar se këta shtetas, individualisht dhe në bashkëpunim me njëri-tjetrin, shfrytëzonin për të punuar kryesisht gjatë natës, si dhe për të lypur, fëmijët e tyre të moshave 9-11 vjeç, në zona të ndryshme në juridiksion të Komisariatit të Policisë Nr. 2.

Materialet procedurale iu referuan Prokurorisë së Tiranës, për veprime të mëtejshme, për veprën penale “Keqtrajtimi i të miturit””, thuhet në njoftimin e policisë.