Shifrat rekord me COVID-19, Arben Gjata: Shtimi i rasteve i pritshëm, shqetësuese sjellja e njerëzve

Rektori i Universitetit të Mjekësisë, Arben Gjata tha në Euronews Albania se rritja e numrit të rasteve me COVID-19 ka ardhur për shkak të hapjes sociale dhe rifillimit të aktiviteteve ekonomike në vend.

Z. Gjata u shpreh se nuk është shqetësuese rritja e numrave, por sjellja e popullatës, e cila sipas tij ka humbur vigjilencën duke mos respektuar masat e kërkuara nga autoritetet shëndetësore.

“Është e pritur të rriteshin shifrat, me rihapjen sociale dhe rihapjen ekonomike. Për mua nuk është shqetësuese rritja e shifrave, por shqetësuese është sjellja e popullatës. Ato që janë thelbësore për të shmangur këtë sëmundje, që është ruajta e distancimit fizik dhe mbajta e maskave, lë shumë për të dëshiruar. Kemi shumë grupmosha të reja që mendojnë se virusi është larguar. Situata është në dorë të qytetarëve”, tha Gjata.

Ai tha se një pjesë e madhe e qytetarëve të infektuar janë me shenja të lehta, por kjo nuk do të thotë se është zbutur agresiviteti i COVID-19.

“Është e vështirë për t’u thënë, faktikisht dje kishim numrin më të lartë që nga fillimi i epidemisë. E vërteta është se shumica e pacientëve vijnë me shenja të lehta dhe një pjesë e madhe e tyre trajtohen në shtëpi. Por, dy të intubuar dhe 6 në reanimacion nuk do të thotë është situatë e lehtë. Unë besoj se vazhdon të mbetet një sëmundje serioze siç ka qenë më parë dhe me risk të lartë, që më të rrezikuar janë moshat e vjetra, pacientët me sëmundje shoqëruese”, tha ai.

Ministria  e Shëndetësisë konfirmoi dje 36 raste të reja, duke bërë që e marta të shënonte numrin rekord të të prekurve që nga nisja e pandemisë.

Lexoni gjithashtu: 

Shqipëria shënon numrin më të lartë të të infektuarve, 36 raste të reja në 24 orë