Shirat e dendur shkaktojnë përmbytje, të paktën tetë të vdekur në Gjermani dhe Belgjikë

Pas shirave të dendur që kanë shkaktuar përmbytje, të paktën tetë persona në Gjermani dhe Belgjikë kanë humbur jetën.

Reshjet në gjithë Europën Perëndimore kanë bërë që shumë lumenj të dalin nga shtrati në Belgjikë, Gjermani dhe Zvicër.

Policia gjermane deklaroi të enjten se katër njerëz vdiqën në qarkun Ahrweiler dhe se shumë të tjerë janë zhdukur.

Qeveria franceze njoftoi se 40 shpëtues nga Njësia e saj e Trajnimit dhe Ndërhyrjes së Sigurisë Civile, si dhe një helikopter me dy specialistë të shpëtimit të ujit në bord, u nisën drejt Belgjikës për ndihmë.

Në Zvicër, reshjet e mëdha të shiut kanë shkaktuar rrëshqitje të tokës.  Niveli i liqenit të Gjenevës është gjithashtu shqetësues për autoritetet.

Rreziku i përmbytjes ishte i lartë edhe në brigjet e liqenit të Zyrihut dhe lumit Limat. Autoritetet u kanë kërkuar qytetarëve të mos shkojnë në pyje për arsye sigurie, pasi stuhitë janë shumë të forta dhe erërat tejkalojnë 100 km në orë.

Sipas Hekurudhave Federale Zvicerane disa kalime malore dhe tunele janë mbyllur, ndërsa trafiku hekurudhor është ndërprerë në disa pjesë të vendit.

LEXONI GJITHASHTU: 

• Mot ekstrem në Evropë, përmbytje në Gjermani dhe Zvicër
• Stuhia “Elsa” shkakton përmbytje në Nju Jork
• Përmbytjet në Australi detyrojnë shpërnguljen e mijëra banorëve