Shkarkimet masive nga institucionet federale që po bën presidenti Donald Trump dhe këshilltari i tij miliarder Elon Musk po krijojnë një rrezik të paprecedent spiunazhi ndaj Shteteve të Bashkuara.
Alarmi është dhënë nga ekspertë të sigurisë dhe inteligjencës, të cilët kanë paralajmëruar se informacioni dhe lidhjet që kanë punonjësit e shkarkuar mund të bien në duar të gabuara.
Revanshi i Departamentit për Efikasitetin Qeveritar, i drejtuar nga Musk, ndaj agjencive qeveritare po u ofron një mundësi vendeve rivale si Rusia dhe Kina që të rekrutojnë informatorë, kanë nënvizuar ekspertët.
Çdo vit në Shtetet e Bashkuara, mesatarisht mbi 100 mijë punonjës federalë braktisin vendet e punës, herë për t’u tërhequr dhe herë për të kaluar në sektorin privat.
Që nga fillimi i 2025-s, shifra në fjalë dyshohet të jetë shumë më e lartë, edhe pse për fushatën e shkarkimeve nuk ka ende një shifër zyrtare.
“Është diçka që ndodh edhe në periudha të qeta. Dikush nga komuniteti i inteligjencës, për arsye personale apo financiare hyn në ambasadën e një vendi armik dhe shet Amerikën. Por ajo që po bën administrata aktuale e çon rrezikun në një nivel tjetër”, ka deklaruar John Schindler, ish-zyrtar i kundërspiunazhit amerikan.
“Dikush do të rebelohet, është vetëm çështje kohe dhe sa i madh do të jetë rreziku”, ka vijuar ai.
Rastet e profilit të lartë të tradhtisë në historinë moderne të Shteteve të Bashkuara janë ato të ish-agjentit të FBI-së, Robert Hanssen dhe ish-oficerit të CIA-s, Aldrich Ames, të cilët spiunonin në favor të Rusisë.
Hanssen u jepte rusëve detaje mbi informatorët e agjencive të Shteteve të Bashkuara në Moskë, të cilët më vonë u ekzekutuan për faktin se punonin për llogari të Uashingtonit.
LEXONI GJITHASHTU:
- Trump revokon lejet e sigurisë për Harris, Clinton dhe disa kritikë të tij
- “Të keni turp”- Trump i pakënaqur me portretin e tij: Më mirë të mos ishte fare
