Shkarkimi i ministrit të Drejtësisë në Mal të Zi, Ali Salaj: Qeveria në krizë, dy aleatët kryesorë i ka kundër

Sipas gazetarit Ali Salaj Mali i Zi “është në udhëkryq” pasi çështja e shkarkimit të ministrit të Drejtësisë Vlladimir Leposaviç mund të rrëzojë dhe vetë qeverinë e Zdravko Kripokapiç.

Duke komentuar situatën politike në vendin fqinj, Salaj tha për Euronews Albania se “qeveria është në krizë të madhe” pasi “dy aleatët e saj kryesore nuk do ta pranojnë shkarkimin e ministrit”.

Më 26 mars ministri Leposaviç tha në parlament se Mali i Zi do ta pranojë se në Srebrenicë ka pasur gjenocid “kur kjo të vërtetohet pa dyshime”. Një deklaratë e tillë nxiti reagime të ashpra, pasi vuri në diskutim edhe njëherë vendimet e Gjykatës së Hagës për luftimet e fillim-viteve 90-të gjatë shpërbërjes së ish-Jugosllavisë. Kjo gjykatë e ka cilësuar si gjenocid vrasjen e mijëra civilëve në Srebrenicë të Bosnjës.

Së fundmi për këtë çështje ka reaguar edhe Presidenti Aleksandar Vuçiç, i cili tha se Zdravko Krivokapiç “po i shërben Brukselit dhe Shtëpisë së Bardhë”.

Gazetari Salaj tha se me ndikimin politik serb që ka Mali i Zi çështja është ndërlikuar edhe më tej. Megjithatë ai tha se kishte besim që do të gjendej një kompromis për kapërcimin e kësaj situate.

“Besoj se do të gjendet një kompromis, do të shkarkohet ministri aktual i Drejtësisë dhe do të gjendet një tjetër, pasi dihet që këto ministra nuk janë përfaqësues domethënës të partive, por janë ekspertë,” – u shpreh gazetari Salaj.

Zgjedhjet e vitit të kaluar rrëzuan pas 30 vitesh në pushtet Partinë Demokratike të Socialistëve. Me një koalicion shumëpalësh – mes Frontit Demokratik (21 deputetë), Demokratët (10 deputetë), Partia Popullore Socialiste (5 deputetë) Lëvizja URA (4 deputetë) dhe “Mali i Zi i Vërtetë” (1 deputet),  – qeveria e Kripokapiç u votëbesua në dhjetor me 41 vota në parlament.

Nga koalicioni qeverisës grupimet kryesore janë pro-serbe, ndërsa “Lëvizja URA” e Dritan Abazoviç, e cila është deklaruar shpesh se “sheh nga Brukseli”, duket se do të ketë në dorë fatin e qeverisë. Salaj tha se “Abazoviç e mban në këmbë qeverinë”.