Shkarkimi i Valdete Dakës, a është kompetencë e presidentit? Përgjigjet avokati Palushi

Shkarkimi i kryetares së Komisionit Qendror të Zgjedhjeve në Kosovë, Valdete Daka në prag të zgjedhjeve vendore ka krijuar një sërë polemikash.

Avokati, Kushtrim Palushi tha për Euronews Albania se shkarkimi i kryesuesit të KQZ-së, nuk është kompetencë e presidentit sepse duhet të jetë një komision i posaçëm ose organet e brendshme të cilat të vlerësojnë deri në çfarë pike është dëmtuar imazhi.

Ligji e parasheh se presidenti mund ta shkarkojë kryesuesen e KQZ-së, por çështja është se sa presidenti mund të konstatojë vetë rrethanat faktike që mund të shpien në shkarkimin, konkretisht të Valdete Dakës.

“Arsyeja që është përmendur për “dëmtimin e imazhit të KQZ-së”, duhet të formohet një komision hetimor që të konstatojë se si, në çfarë rrethanash dhe me çfarë veprimesh, në çfarë kohe, kryesuesi i KQZ-së ka dëmtuar imazhin e këtij institucioni, dhe më pas t’i rekomandojë presidentit shkarkimin e kryesuesit të KQZ-së,” – u shpreh avokati.

Palushi theksoi gjithashtu se në të tilla kushte, Daka mund t’i drejtohet Gjykatës Kushtetuese për realizimin e të drejtave të saj.

LEXONI GJITHASHTU:

• Presidentja e Kosovës shkarkon kryetaren e KQZ-së, Valdete Daka
• Valdete Daka: Vendimi i presidentes për të më shkarkuar është qesharak
• Shoqëria civile kundërshton shkarkimin e kryetares së KQZ-së