Shkodra e Vlora paralajmërojnë përgjysmim të autobusëve urbanë

Edhe Shkodra e Vlora kanë paralajmëruar përgjysmimin e autobusëve të trafikut urban për qytetarët.

Shoqata e transportit në Shkodër ka thënë se do përgjysmojë mjetet deri në pezullimin e punës. Edhe shoqata e transportit në Vlorë bën të ditur se ka probleme financiare si rrjedhojë e shtrenjtimit të naftës, por thotë se ende nuk ka marrë një vendim.

Bëhet e ditur se biltetat e transportit publik nuk kanë ndyshuar.

Në Tiranë, Unioni i Transportit Publik kërkon heqjen e akcizës dhe uljen e TVSH-së, përndryshe do të vazhdojë të operojë me gjysmën e autobusëve.

Unioni kërkon heqjen e akcizës, indeksimin e çmimit dhe zbritjen e TVSH-së  nga 20% në 6%.

Fatjon Kasamaj, nënkryetar i  Shoqatës së Transportit Publik, gjatë një intervistë për Euronews Albania ka thënë se ky është një vendim që ishin të detyruar ta merrnin sepse kostoja është e papërballueshme për operatorët. Ai thotë se presin që të paktën gjysma e kushteve të kërkuara.

“E fundit që ngelet është ngritja e çmimit të biletës, gjë të cilën ne nuk e dëshirojmë, por nuk kemi zgjidhje tjetër për momentin”, tha ai.

Përgjysmimi i flotës urbane do të vazhdojë pa afat, deri kur të plotësohen kushtet e kërkuara, thonë përfaqësuesit e Unionit.

Ky vendim, që nga fillimi i javës ka sjellë kaos, radhë në stacione dhe mbipopullim të autobusëve të trafikut urban në kryeqytet.

LEXONI GJITHASHTU:

• Transporti në krizë pa afat në Tiranë, qytetarët të revoltuar