Shoferët më agresivë, grupmosha 18-25 vjeç

Euronews Albania ndoqi nga afër një nga aksionet e policisë për parandalimin e aksidenteve rrugore.

Nga kontrollet që ushtrohen nga një grup i posaçëm, rezulton se të rinjtë janë shoferët më agresivë në rrugë, ndërsa në masë po gjobiten edhe makinat luksoze për abuzim me xhamat e zinj.

Rritja e vlerave të gjobave nuk ka ndikuar aspak në përmirësimin e situatës në rrugë. Shpejtësia, manovrat e rrezikshme apo garat mbeten shkeljet që sjellin pasojat më të rënda.

“Shpesh herë kohët e fundit kemi vënë re aksidente me dëme në njerëz por dhe me dëme materiale dhe si shkak determinant është mos-rregullimi i shpejtësisë. Është neglizhenca e drejtuesve të mjeteve, grupmosha kryesore nga 18 deri 25 vjeç të cilët janë përdoruesit më agresivë. Ndoshta për shkak të moshës por dhe panjohurive të duhura të kodit rrugor. Janë grupmosha të reja që përdorin mjete me kapacitet kubik me fuqi të lartë motorike që kërkon një peripecie të madhe në drejtimin e mjetit,” – deklaroi komandanti i trafikut, Gerhard Baka.

Një tjetër shkelje që po konstatohet në masë është errësimi i xhamave të zinj mbi normat e lejuara. Për këtë rrugorët e Tiranës janë pajisur edhe me aparatin që mat tejdukshmërinë e xhamave të zinj.

 “Konstatojmë me keqardhje që mbi 95% qe ne kemi ndaluar dhe kontrolluar nuk e kanë respektuar udhëzimin e lëshuar nga drejtoria e përgjithshme e shërbimeve të transportit rrugor. Vërehet se shkelet nga përdoruesit e mjeteve, kryesisht luksoze dhe vit prodhimi të fundit,” – tha Baka.

Përdorimi i celularit gjatë drejtimit të mjetit dhe ekspozimi i shpejtësisë në rrjetet sociale është një tjetër fenomen i rrezikshëm tek grupmoshat e reja.

LEXONI GJITHASHTU:

• Arrestohen 22 shoferë, policia rrugore masa të shtuara për parandalimin e aksidenteve