Gjergji Vurmo: Shoqëria civile e zhgënjyer nga ndërkombëtarët për Reformën Zgjedhore

Shoqëria civile ka dalë e pakënaqur nga takimi i sotëm i Këshillit Kombëtar të Integrimit, ku i janë lënë vetëm dy minuta kohë diskutimi. Përfaqësuesit ankohen se roli i tyre në konsultim është i papërfillshëm dhe se plan-veprimi i këshillit nuk adreson siç duhet çështje të rëndësishme.

Zana Vokopola, eksperte e çështjeve urbane tha për Euronews Albania se gjërat e reja që po ndodhin shënojnë një zhvillim pozitiv, por sipas saj është në interesin e të gjithëve që fjala e shoqërisë civile të dëgjohet dhe të merret në konsideratë.

Ajo pranoi faktin se me gjithë aktivizmin e shoqërisë civile, shoqëria shqiptare është e politizuar skajshmërisht dhe besimi tek shoqëria civile nuk është ai i duhuri.

“Sado që ne përpiqemi shumë, është thjesht një grup ekspertësh dhe nuk kemi autoritet para politikës, njerëzit tek ne janë shumë të politizuar. Do kohë që ky zë të jetë i fuqishëm dhe me autoritet”, tha znj. Vokopola.

Nga ana tjetër, Gjergji Vurmo, drejtues i programit në Institutin për Demokraci dhe Ndërmjetësim deklaroi për Euronews Albania se kontributi që po jep shoqëria civile në këtë këshill është falas dhe e vlefshme.

Sipas tij, në këtë fazë ku ndodhet procesi i fundit të tranzicionit, është shumë i rëndësishëm roli i këtyre kapaciteteve të shoqërisë civile, por edhe medias apo akademikëve.

“Sot për fat të keq kemi 15 nga 14 kushte të vendosura nga Bundestagu për Shqipërinë, sepse nuk u morën parasysh këshillat tona”, tha z. Vrumo.

I pyetur me zhgënjimin që herë pas here artikulohet lidhur me shoqërinë civile, veçanërisht lidhur me zhgënjimin e ndërkombëtarëve sa i përket angazhimit të tyre në reformën në drejtësi, z. Vurmo tha se nga ajo periudhë e në vazhdim, momente të zhgënjimit të ndërsjellë mes shoqërisë civile dhe ndërkombëtareve nuk kanë munguar.

“Marrëveshja e fundit që është mbështetur fuqimisht nga ndërkombëtarët ka bërë që një pjesë e madhe e shoqërisë civile të jenë shumë të zhgënjyer me ndërkombëtarët”, tha ai.