Shoqëria civile kundërshton shkarkimin e kryetares së KQZ-së

Njëmbëdhjetë organizata të shoqërisë civile kanë kundërshtuar vendimin e presidentes Vjosa Osmani për shkarkimin e kryetares së KQZ-së, Valdete Daka.

Këto organizata nëpërmjet një komunikate për mediat thonë se argumentet e përditësua nga presidentja janë të pabazuara dhe paraqesin keqinterpretim të situatave përkatëse.

“Marrja e këtij vendimi në prag të shpalljes së datës së zgjedhjeve lokale përbën ndikim të drejtpërdrejtë në pavarësinë, integritetin dhe mbarëvajtjen e punës së KQZ-së në organizimin dhe administrimin e atyre zgjedhjeve”, thuhet në reagimin.

Në njoftimin e Presidencës së Kosovës thuhet se “në procesin e fundit zgjedhor, KQZ ka qenë e polarizuar dhe mbledhjet e vendimmarrja janë shoqëruar me tensione si kurrë më parë”.

Pas shkarkimit të znj. Daka, Presidentja Vjosa Osmani ka emëruar gjyqtarin e Gjykatës së Apelit, Kreshnik Radoniqi si kryesues të ri të Komisionit Qendror të Zgjedhjeve.

Kryetari i ri i KQZ, Kreshnik Radoniqi është gjyqtar në Departamentin Special të Gjykatës së Apelit. Gjyqtari Radoniqi, në vitin 2006 ka diplomuar në Fakultetin Juridik të Universitetit të Prishtinës, ndërsa në vitin 2013 ka përfunduar studimet master në SHBA.