Shpejtësi si në Formula 1, mbi 20 shoferëve u “fluturon” leja e drejtimit

Të udhëtosh në superstradën Tiranë-Durrës është një rrezik i madh. Jo vetëm hyrje daljet e automjeteve por edhe kalimi nga njëri krah i rrugës në tjetrin kthehen shpesh në shkak për aksidente, që rezultojnë dhe fatale.

Por, një nga rreziqet më të mëdha e udhëtimit në këtë rrugë është shpejtësia e lartë. Një pjesë e mirë e shoferëve sidomos gjatë natës nuk e respektojnë kufizimin 90 km/h aq sa është shpejtësia maksimale që lejohet në këtë segment rrugor.

Nga një vrojtim gjatë ka bërë Policia Rrugore gjatë kësaj fundjave, janë pikasur shoferë duke lëvizur me shpejtësi deri në 177 km/h. Gjithashtu nuk kanë munguar as rastet kur shoferët kanë qenë duke udhëtuar në gjendje të dehur.

“Janë pezulluar 11 Leje Drejtimi, për shpejtësi që varionin nga 137 km/h deri në 177 km/h.  Dhe 10 Leje Drejtimi për drejtim mjeti nën efektin e alkoolit që varionin nga 0.40mg/l deri në 0.49 mg/l. Dy drejtues mjetesh në pranga për drejtim mjeti në gjendje të dehur që varionin nga 0.59 mg/l deri në 0.89 mg/l, sasi që sipas testeve të verifikuara vinte në rritje dhe njëri prej drejtueseve të mjeteve në gjendje të dehur kishte dalë nga rruga, fatmirësisht pa dëme në njerëz”, bëhet e ditur nga policia.

Në shumicën e rasteve gjobitjet në kryeqytet janë për parkime të gabuara ndërsa mungon ndëshkimi i shoferëve që shkelin rregullat e qarkullit, të cilët në shumicën e rasteve bëhen shkak për aksidentet dhe bllokim të qarkullimit.